Горд Кар яке Йошкар-Ола

«Ми татчы вуылом на, » - шуи мон эшелы кылем арын, Йошкар-Олаын выж вылын ву шоры учкыса сылыку. Соку мон ӧй но малпа, ми зэм но нош ик та каре берытском на шуыса.

Тулыспалэ мон эшеным Марий Эллэн шоркараз дышетскыны вуи. УдГУ борддоръёс воштӥськизы МарГУ  борддоръёслы. Туж трос малпанъёс, кышканъёс вал лыктон азьын. «Мар мон татын карисько? Мар мон татын ыштӥ?» - та юанъёс нырысетӥ арняе монэ ӧз куштылэ. Мыным номыриз но уг кельшы вал: кезьыт висъёт огъяулонниын, университет корпусъёслэн лабиринт выллем корридоръёссы, суро-пожо расписание, котькытысь чузъяськись валантэм кылъёс. Котырме басьтыса, берлань Ижкаре кошкеме потэ ни вал. Но малпай: «Мар-о тон, Женя, куинь толэзь мукет элькунын уд чида-а?» Мӧзмонме но йыркурме кырымам кутыса, мон кутски улонме выль карын.

Паймымон, татын ваньмыз тунсыкъясько милемын. Асьмедыз иностранецъёс кожаськом ни. Вань ужрадъёсы пыриськыны дэмлало, культураенымы тодматыны. Туж кельшиз «Lingva-Территория» фестиваль. Дас куать калыкъёс анай кылъя кык урок нуизы. Таджикъёс, арабъёс, киргизъёс, французъёс но трос мукет калыкъёс пӧлын мон но эшеным вал. Ми дышетӥм кӧня ке кылъёслы, верам алфавитмылэсь аспӧртэмлыксэ, тодматӥм вашкала но туала культураен, дышетӥм пичи эктон но сюдӥм удмурт сиёнэн. Удмурт кылъя урокмес возьматыны милем татысь удмурт нылаш юрттӥз на. Ӵапак та ужрадын милемын тодматскиз ГТРК Марий Элысь журналист. «Люди мира» теле-передачае пыриськыны ӵектӥз. Озьен, удмуртъёс сярысь видео-ролик но кылдытзы. Со сяна «Открой своё сердце миру» ӝыт фестивальын удмурт выставкаын ми тодматӥм вашкала костюмъёсын  но удмурт сиёнэн сюдӥм.

Асьмеос но мари культураен тодматским. Национальной сиёнзэс веръям, музее ветлӥм, мари кыл дышетӥськом. Кылзы секыт, мыным потэ. Туж ӧжыт огъяез удмурт кылэн. Матынгес финн кыллы. Но озьы ке но, вераськемзэс ӧжытак валаськом ни.

Али, ку дышетсконмылы кык арня сяна ӧз ни кыльы, мыным луэ ӝож! Дышиськиз кезьыт комнаталы но, лабиринт кадь корридръёсын но уд ни йыромиськы, дышетӥсьёс но выль эшъёс туж ӟечесь, котьку юрттыны, урод мылкыдэз ӝутыны дасесь. Тросэз, милемын тодматскем бере, кутскизы удмурт кылэн тунсыкъёскыны. Удмурт кылъя курсъёс но усьтэмзы потэ! Нош мынам тодэ-ваёнъёсам пыраклы кылёз туж чебер набережной, Москваын кадь сылӥсь Кремль, туж трос памятникъёс. Йошкар-Ола бадӟым ӧвӧл, татын пыдын мыныса но котькытчы ӝог вуыны луэ. Озьы ке но трос тунсыко интыосыз вань. Но туж ӟеч калык...соиз зэм. Ноку уг вунэты соосты, кинэн татын тодматски.