«Алданин»

Куалекъясь киосын со мырдэм поттӥз «Алданин» упаковкаысь пичи тӧдьы таблетаез.  Ӝоген ымаз вайыса, вуэн ньылӥз. Пуктӥз ӝыныё стаканзэ раковина вылэ.  Синучконын шораз учке егит, муспотон  али кӧлэмысь султэм нылаш. «Эшшо одӥг нунал,- кален шыпыртэ со. – Таблеткаосы быро ни.  Кулэ выль басьтыны.» Потэ ваннойысь.  «Ӝытазе пумиськисько пияшен. Хм… кемалась мон свиданиосын ӧй вал. Мар дӥсялом?»- ас понназ вераськыса, пырее комнатаяз.

Ӝыт. Ресторан. Нылаш пуке чебер ӝок сьӧрын, нош солы пумит пиосмурт. Кӧня ке арлы солэсь мӧйыгес. Дӥсяськемезъя, ужа кыӵе ке серьёзной интыын.

- Тон туж чебер, Марина, - матэгес сётскыса шуэ воргорон.

- Тау, - мыня. – Мон кемалась ветлымтэ таӵе чебер интыосы. Толон милям тодматскыны умой ӧз пӧрмы, жаляса верано. Шумпотӥсько ӧтемдылы, Михаил.

- Миша. Шу монэ Миша. Простить кар, юан сёто: кельшо-а тыныд «Алданин» таблелкаос? Зэмзэ шуоно ке, мон ужасько отын, кытын нырысьсэ соосты малпазы. Али нош выриськом выль ӵектосъёс бордын. Ваньмыз адями понна, тон валаськод.

- Тон ужаськод сыӵе секретной интыын? Паймымон… Конечно,« Алданин» мыным яра! Соостэк, малпасько, адями кемалась бырысал ни. Ведь соос вылын возиське улонмы. Соос юртто шоканы таӵе урод атмосфераын но. Шуо, кислород ичигес но ичигес луэ ни. Тау тӥледлы,таӵе юрттӥсь таблеткаос понна. Нош мон кылылӥ, тӥ ОТЫН со турттӥськоды пӧрмытыны таблетка, кудӥз юрттоз адямилэн визьмыныз, шӧдонъёсыныз кивалтыны. Мон у гик оскиськы но, зэм-а со?

- Кивалтыны? –серекъя. – Тон мар? Адямиен кивалтон со воксё аморально ук. Со сяна милям техника уз сёты сыӵе уж лэсьтыны. Солы кулэ на сюрс пала аръёс.

-Ярам.

Кыкназы серекъяло, сисько, маке сярысь верасько.

Вуизы Мишалэн квартираяз. Чылкыт, югыт холостяцкой квартира. Полка вылын трос тодос ласянь книгаос. Миша кухняе кошкиз. Марина укно дорысь полка пала вамыштӥз, тунсыкъяськыса учке книгаосты. Но одӥгез пушкысь усиз листок. Нылыш ӝутӥз. Адями суредэн, гожъямъёсын кыӵе ке чертеж: « «Алданин» - адямиен кивалтонын амалъёс.» Марина долкаса учке гожъямъёс шоры. Комнтатае пыре Миша. Соос ог минут долкаса учко ог огзы шоры.

- Тӥ выриськоды таӵе ужъёсын??? Кызьы? Тӥ адямилэсь йырзэ пожаськоды! Тӥ сое быдэссэ ас ки улады карыны мелӥськоды-а? Может мон но пырисько соос пӧлы? Тон монэн но кивалтыны быгатӥськод-а? – комнатаысь бызьыса потэ.

- Марина, сыл! – кезьыт кужмо куараен кеськиз Миша. Нылаш соку ик итыяз дугдӥз. Йӧ кадь синъёсыз, шокамез но уг кылӥськы. – Марина, али тон берытскод ,но ми йылпумъялом ӝытмес. Тон номае но ӧд адӟы но нокинлы уд вера, - нош ик кылӥськиз воргоронлэн кезьыт металлической куараез.

Интыяз долкам нылаш каллен берытскиз…